โลกนฺธการหนนมฺหิ มหาปทีปา; นิพฺพาปิตา มรณโฆรมหานิเลน, เตนาปิ ชีวิตมทํ มติมา ชเหยฺยาติฯ สุชนปฺปสาทํสํเวคตฺถาย กเต มหาวํเส ปฐมธมฺมสํคีตินาม ตติโย ปริจฺเฉโทฯ จตุตฺถ ปริจฺเฉท ทุติย สํคีติ อชาตสตฺตุ ปุตฺโต ตํ, ฆาเตตฺวา’ทายิ ภทฺทโก; รชฺชํ โสฬสวสฺสานิ, กาเรสิ มิตฺตทูภิโกฯ อุทยภทฺท ปุตฺโต ตํ, ฆาเตตฺวา อนุรุทฺธโก; อนุรุทฺธสฺส ปุตฺโต ตํ, ฆาเตตฺวา มุณฺฑนามโกฯ มิตฺตทฺทุโน ทุมฺมติโน, เต’ปิ รชฺชมการยุํ; เตสํ อุภินฺนํ รชฺเชสุ, อฏฺฐวสฺสาน’ติกฺกมุํฯ มุณฺฑสฺส ปุตฺโต ปิตรํ, ฆาเตตฺวา นาคทาสโก; จตุวีสติวสฺสานิ, รชฺชํ กาเรสิ ปาปโกฯ ปิตุฆาตกวํโส’ย, มีติกุทฺธา’ถ นาครา; นาคทาสก ราชานํ, อปเนตฺวา สมาคตาฯ สุสุนาโคติ ปญฺญาตํ, อมจฺจํ สาธุสมฺมตํ; รชฺเช สมภิสิญฺชิํสุ, สพฺเพสํ หิตมานสาฯ |